Bi Kirdki (Zazakî) yewna eserêko newe “BENA HOL” çap bi!

Ziwanê ma de hetê Weşanxaneyê NASî ra yewna esero newe Kirdkî (Zazakî) ame çapkerdiş. Kitabê hîkayeyan oyo ke hetê rojnameger/nuştox Enwer Yilmazî ra ameyo nuştiş vejîya.

Weşanxaneyê NASî çarçeweya xebata zafziwanîye de xebatanê xo domnena. Weşanxaneyê NAS keno ke ca bido heme lehçeyanê Kurdkî ûînan çap biko. Weşanxaneyî, nika zî kitabê rojnameger Enwer Yilmazî yê hîkayeyan çap kerd. Rojnameger Enwer Yilmaz bi serrran o Kurdkî rê xizmet keno. Yilmazî nê kitabe xo bi lehçeya Kirdkî “BENA HOL” nuşto û no kitab, kitabe ey yo diyîn o. Kitabe Enwer Yilmazî yo yewin (Ti Dejêko Bêwayîr î) serra 2014 de ame çapkerdiş. No kitab, “BENA HOL” kitabê ey yo diyîn o.

Kitabe Enwer Yimazî “BENA HOL” 153 rîpel o û mîyan de 12 hîkayeyî estê. Yilmaz derheqê kitabê xo de vano ke, ‘No kitab de zî behsê cuya ma ya Kurdan beno. Hîkayeyê ma Kurdan nêzdîyê yewbînan ê. Zaf manenê yewbînan.  Dewletanê serdestan timî cuya ma kerdê lete û heram. Derd û dejê şarê ma zaf ê. Neheqî, feqîrî, bêedeletî û bindestî sey qeder ma rê ameyê ferzkerdiş. Erdê ma lete, ziwanê me lete, şarê ma perçe û yo tewr xirab zî sîyasetê ma perçe yo. La ma zanenê ke, no qederê ma kurdan nîyo. Mi kitabê xo de pê hîkayeyan behsê na bindestî û neheqî kirda. Tikê hîkayeyan de ez qala xo kena la mîyanê ê hîkayeyan de zî onca hîkayeya ma Kurdan esta.’

Yilmaz vano ke, wexto ke merdim nê çîyan sero nuseno zaf dej anceno û wina dewam keno ‘ez deme nuştişê hîkayeyan de zaf pê dejaya. Ma kurdan rê cuyayîş zaf zehmet o. Wexto ke merdim nê zehmetîyan nuseno zî zaf zehmetî anceno. Qederê ma û neheqîya ke ma rê bîya zaf giran a. La ma mecburê ke behsê nê çîyan bike. Eke ma nênuse, ma rasyîya xo ra durî kewenê. Lazim o na rastîya ma bibo babeta edebîyatî. Xora edebiyat bin ê çîyan xo keno wey. Xeylê nuştoxê ma zî wina kenê. Xora bi Kurdkî nuştiş tena çîyêko muhîn û bimbarek o. Xoverdayîşo tewr pîl Kurdkî nuştiş o. Merdim bi ziwanê xo binuso, biwano û pê xebate biko, mucadeleyo tewr pîlo o.’

Yilmazî qale ard rewşa Zaravaya Zazakî ser o va ‘seke yeno zanayîş halê ziwanê ma baş nîyo. Polîtîkayanê asîmîlasyonî ver ziwanê ma roj bi roj helîyeno. Eke tedbîrê cidî nêrê girewtiş no ziwano qedîm û weşik sibaroj vindî beno. Dezgeyê UNESCOyî zî raporê xo de îzah kerdo ke, no ziwan ver bi mergî şino. no çîyêko zaf bitehlûke yo. Lazim o ma vernîya nê asîmîlasyonî bigîre.. Çi rojname çi televîzyon çi edebîyat çi sînema… Ferq nêkeno. Ganî ma pawê dewlete nêvinde. Xemê dewlete nîyo ziwanê merdo yan nêmerdo, esto yan çin o. Xora dewlete qayîla wa zimanê Kurdî bimiro. Gere ma zor bide îmkananê xo. Gere ewilî ma bi xo wayîrê ziwanê xo vejîyê. Ma bi ziwanê xo binuse, temaşe bike, qisê bike aver bere. 

Çime: http://www.rupelanu.com/mobi/news_detail.php?id=4064


Enwer Yılmaz, Bena Hol, Weşanxaneyê NAS, Îstanbul 2018, 153 rîpelî

Bi Kirdki (Zazakî) yewna eserêko newe “BENA HOL” çap bi!” için bir yorum

  1. BENA HOL
    Şew bena roj
    Kard bena tej
    Çer nono poj
    Ton mend vijena roj
    İtera pey bena hol

    Destonxu héne bık
    Ver berxu pak bık
    Kıncoxu newo payk
    Xaliya sür rak
    Sıba bena hol

    Werz pay çı roşen
    Er árefat sıba roşon
    Çerçi kınco roşön
    Palı’ra erjo don
    Inkay bena hol

    Dünya faniya nıbena hol
    Heg roj bena kıhon
    Ma hewaley Alla(h)y ken
    Ya dünyad bena hol

    Zımıston serd emnon germ
    Nızon bıhüy nızon berm
    Ne heya zon ne şerm
    Sıba ne ber bena hol

    Perdon pençronxu ak
    Sölon rındo payk
    Vij meydonıd kayk
    Tı holıb yez bena hol.

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir